Maliyyə-mühasibat araşdırması (ekspertizası) xidmətindən istifadə etməklə fiziki və hüquqi şəxslər, eləcə də digər qurumlar (bələdiyyələr, müxtəlif dövlət orqanları və ya dövlətin payı olan şirkətlər), saxtakarlıq, mənimsəmə, səhlənkarlıq, üçüncü şəxslərin mənafeyinə uyğun fəaliyyət, çirkli pulların yuyulması və digər qanunsuz hərəkətlər nəticəsində onlara dəyən zərər və əldən çıxan faydanın müəyyən edilməsi, qiymətləndirilməsi və sənədləşdirilməsinə nail ola bilərlər. Bununla yanaşı, maliyyə itkilərinin hüquq-mühafizə orqanlarında müvafiq ekspert müdafiəsi ilə təsdiqlənməsi təmin edilir.
Maliyyə-mühasibat ekspertizası, biznesin idarə edilməsi ilə bağlı müxtəlif sahələrdə, o cümlədən satış-marketinq, təchizat-logistika, istehsalat və əməliyyatların idarə edilməsi, tikinti və abadlaşdırma, kadr idarəçiliyi və digər sahələrdə tətbiq olunur. Bu ekspertiza, nağd vəsaitlər və bank əməliyyatları, qiymətli kağızlar bazarı, vergi və digər rəsmi ödəniş əməliyyatları, müştəri və digər kontragentlərlə qarşılıqlı hesablaşmalar, hesabatların hazırlanması və digər mühasibat əməliyyatları ilə əlaqəli olaraq baş vermiş və ya potensial baş verə biləcək saxtakarlıq, səhlənkarlıq, qanunsuzluq və qayda pozuntularını aşkar etməyə və preventiv tədbirlərin görülməsinə yönəldilir.
Maliyyə-mühasibat ekspertizasının həyata keçirilməsi maliyyəçi, mühasib, auditor, hüquqşünas və vəkil, eləcə də araşdırılan sahəyə uyğun sahəvi və akademik ekspertlərdən ibarət ixtisaslaşmış qrup tərəfindən icra edilir. Araşdırmalar üçün zəruri olan məlumatların toplanması prosesində müxtəlif üsul və texnikalardan istifadə olunur.
